Klub i themeluar para tre viteve, por me ambicie të mëdha. Pak kush në qytetin e Prizrenit kishte besuar se A&N-ja do të mbijetonte, aq më pak të krijojë një grup të mirë të lojtarëve.
E në krye të këtij projekti sportiv është pronari, Agim Burduri, i cili i besoj punën trajnerit shumëvjeçar dhe ish-futbollistit të Lirisë, Genc Tamniku.
Ky i fundit, fjalëpak, por mjaft punëtor, ka arritur që me sukses të krijojë një ekip solid dhe që në vitin e parë të garimit, ta inkuadrojë skuadrën në Ligën e Parë.
Trajneri ka dhënë një intervistë për Telegrafin teksa ka treguar për synimet e klubit, por edhe ka analizuar kundërshtarët e Ligës së Parë të futbollit të Kosovës, gjegjësisht Grupit A, e cila me të drejt po quhet edhe sikurse “Superliga B”.
“Liga e Parë këtë sezon do të jetë edhe më konkurruese. E gjithë kjo pasi që në grupin tonë gjenden edhe ekipe që dikur ishin kampion të Kosovës. Por, kjo nuk do të thotë që ne të jemi inferior”.
“Ne kemi synimet tona dhe me punën që po bëjmë, besoj se do të arrijmë lart në tabelën e klasifikimit. Me transferimet e fundit, si dhe ardhjet e reja që do të vijmë ndërkohë, nuk do të ishte befasi që në vitin e ardhshëm të garojmë edhe në elitën e futbollit të Kosovës”, tha trajneri.
Në pyetjen tonë se kë e sheh rival të sezonit në Grupin A, strategu deklaroi se të gjitha ekipet janë në të njëjtin nivel.
“Grupi A me të drejt mund të quhet i vdekjes. Deri më tani sa kam marrë informacione, të gjitha klubet kanë bërë përforcime, e cila gjë do ta bëjë edhe më tërheqë sezonin e ri. Prandaj nuk dua që të veçoj ndonjë skuadër. Të gjitha janë në nivelin për t’u inkuadrua në Superligë, por njëkohësisht edhe për të rënë në Ligën e Dytë”, tregohet modest ai.
Theksojmë se 53-vjeçari nuk është vetëm trajner i skuadrës së parë pasi që është “kordinator” i klubit gjersa ishte edhe trajner i skuadrës së femrave, të cilin grup e drejton Blerta Kaçiu.
“Edhe me grupin e femrave kemi synime të mëdha. Kemi bërë përforcime të mira për sezonin e ri. Kemi një ekip konkurrues dhe do të jemi skuadra që do të synoj titullin e kampionit”, pohoi Tamniku.
Kujtojmë se A&N është skuadra e dytë që do të bëjë gara në këtë këtë grup pasi që aty gjendet edhe Liria e Prizrenit.
Ndryshe, klubi është krijuar në vitin 2017 dhe me sukses po bënë gara edhe në ligat e grupmoshave të reja, ku tashmë ka fituar disa turne ndërkombëtarë. /Telegrafi/