Trajneri i Brazilit, Tite, ka thënë se Lionel Messi duhet të tregojë më shumë respekt, pas eliminimit nga Kupa e Amerikës.
Pasi ylli i Barcelonës hodhi akuza se ‘Selecao’ po ndihmohen nga gjyqtarët dhe ishin të përfshirë në korrupsion, trajneri brazilian ka thënë se 32-vjeçari duhet ta pranojë humbjen dhe të tregojë respekt.
Brazili e eliminoi Argjentinën në gjysmëfinale të Kupës së Amerikës, për ta fituar kështu në natën e 7 korrikut trofeun më të çmuar në Amerikën Latine ndaj Perusë.
“Atë që unë e trajtova si të jashtëzakonshëm, si jashtëtokësor, duhet të ketë më shumë respekt dhe të pranojë kur të humbë”, ka thënë Tite pas ndeshjes kur është pyetur për Messin.
“Ne ishim dëmtuar (nga gjyqtarët) në disa ndeshje. Ne luajtëm korrekt kundër Argjentinës gjatë gjithë kohës. Unë jam i sinqertë, ai ka nxitur presion të madh për shkak të reputacionit të tij”, ka shtuar më tej trajneri.
Ndërkohë që ishte i pakënaqur me sjelljen e Messit, Tite pranoi se kapiteni argjentinas nuk duhej të ishte ndëshkuar me karton të kuq ndaj Kilit. /Telegrafi/