Toska Dula, një banore nga Prishtina ka folur për ditën e parë të bombardimeve të NATO-s, që ndodhën 18 vite më parë në Kosovë.
Dula, e cila ishte shumë më e re atë kohë së bashku me gjithë familjen e saj kanë qëndruar gjatë 78 ditëve të bombardimeve në Prishtinë.
“Atë ditë një shoqe e imja e ka pas ditëlindjen, kur ka bërë alarmi na jemi shkrepur nëpër shtëpitë tona. Ajo natë ka qenë tmerr, rryma është ndalur nuk ka pas asnjë dritë”, rrëfen Dula për Orën e Fundit në Klan Kosova.
“Por në momentin kur kanë rënë bombat e parë, e ai moment ka qenë festë. Familja ime kanë menduar se gjithçka do të përfundonte për më së shumti dhjetë ditë, por ja që zgjati më shumë se 70-të”, thotë ajo.
Ajo kujton se në sheshin e tanishëm të Prishtinës, ka qenë një lokal i serbëve ku ata çdo natë kanë festuar, ndërsa familja Dula i ka parë ata në heshtje nga dritaret e tyre.
“Unë edhe tash them, se atë kohë nuk do të doja të isha diku tjetër, sepse unë do të ua tregojë të vërtetën që e kam parë vetë fëmijëve të mi”, tregon Dula. /Klan Kosova/