Sipas tij, skenarët për luftë kanë vdekur, ndërsa incidentet e fundit në Mitrovicë janë me motive ultranacionaliste.
Topi, në vizitën e tij të parë pas pavarësisë së Kosovës, ka përshëndetur punën e institucioneve dhe trajtimin e komuniteteve pakicë, duke theksuar se një gjë të tillë duhet ta ndjekë edhe Serbia me shqiptarët në Luginën e Preshevës.
Të dy presidentët kanë folur në takim edhe për autostradën Tiranë-Prishtinë, për të cilën kanë thënë se do ta krijojë një minishengen në Ballkan, ku qytetarët do të kenë liri qarkullimi pa pasaporta.
Topi: Dy vendet, bashkëpunim të fortë
Presidenti Bamir Topi është takuar edhe me shefin e qeverisë kosovare, Hashim Thaçi. Duke vlerësuar punën e kabinetit, Topi kërkoi që të rritet bashkëpunimi ndërqeveritar i dy vendeve tona, si dhe të përfundojnë sa më parë projektet madhore.
"Kosova e Shqipëria duhet të kenë bashkëpunim të plotë në infrastrukturë, energjetikë dhe marrëveshje të rëndësishme", u shpreh Topi.
Presidenti shqiptar, i njohur për rolin e tij diplomatik në çështje të rajonit, premtoi mbështetje të vazhdueshme te realitetit të ri gjeopolitik të Kosovës.
Nga ana e tij, kryeministri Thaçi vlerësoi rolin e presidentit Topi për njohjen e pavarësisë së Kosovës.
Presidenti Topi menjëherë pas arritjes në Kosovë ka vënë mbishkrimin e tij në simbolin e pavarësisë “NEWBORN”, me ç’rast ka thënë se ky vit do t’i shkojë mbarë pasi që ka filluar me Kosovën. /KTV/TCH/Telegrafi/