Tom Hardy ka krijuar një faqe për të mbledhur fonde pas shpërthimeve në Manchester Arena, të hënën, gjatë koncertit të Ariana Grandes.
“Ajo që ndodhi në koncertin e Ariana Grandes ishte një tragjedi”, ka shkruar aktori 39-vjeçar në faqen e mbledhjes së fondeve, transmeton Klan Kosova.
“Familje dhe fëmijë u sulmuan dhe u vranë në një vend ku ata duhet të ishin të sigurt dhe të shijonin koncertin. Është një mizori e pakonceptueshme. Nuk ka kthim prapa atyre që kanë humbur jetën, në mënyrë të pakuptimtë, në një mënyrë kaq frikacake dhe brutale. Jam vërtetë i pikëlluar nga kjo ngjarje”.
“Shpresoj që mes nesh ne mund të mbledhim disa fonde si një gjest vullnet mirë dhe dashuri për të ndihmuar në një farë mënyre drejt riparimit të disa prej dëmeve të bëra”.
“Terrorizmi është i neveritshëm, vrasja e fëmijëve të pafajshëm është e papranueshme. Ju lutem ndihmoni, faleminderit”, ka shtuar ai.