Trajneri i KB Pejës, Aleksandar Todorov, ka deklaruar para duelit gjysmëfinal në Final Four të Kupës së Kosovës që zhvillohet këtë fundjavë se ekipi i tij nuk është favorit ndaj Bashkimit.
Final Fouri i këtij viti mbahet në Mitrovicë në palestrën Minatori, aty ku këtë fundjavë do të ndahet trofeu i parë për këtë edicion, shkruan Telegrafi.
KB Peja ndeshjen e parë e zhvillon në gjysmëfinale ndaj Bashkimit të premtën nga ora 16:30.
Dhe fakti që Peja nuk ka luajtur asnjëherë këtë sezon me Bashkimin e bën teknikun Aleksandar Todorov të mos e konsiderojë skuadrën e tij favorite.
“Nuk kemi luajtur ende kur Bashkimit dhe nuk kemi informacione për kundërshtarin, pasi kohëve të fundit kanë ndërruar shumë lojtarë. Kemi informacione nga ndeshjet e fundit, por në fund do të varet nga loja jonë”.
“Po të ishte ndeshje playoffi me tri fitore, atëherë ne do të ishim favoritët, por në ndeshje të Kupës ku vendoset vetëm në një ndeshje nuk ka favorit”, u shpreh Todorov për TV Dukagjinin.
