Sekretari amerikan i Shtetit, Rex Tillerson paralajmëroi sot për rolin alarmant që luan Kina dhe Rusia në Amerikën Latine, duke i bërë thirrje fuqive rajonale të bashkëpunojnë më shumë me SHBA-në.
“Amerika Latine nuk ka nevojë për fuqi të reja imperialiste që ndjekin vetëm interesin e tyre”, deklaroi ai në një fjalim mbi marrëdhëniet mes Uashingtonit dhe fqinjëve jugorë, para se të fillojë një tur në këtë rajon.
“Modeli shtetëror kinez i zhvillimit mbështetet tek e kaluara. Kjo nuk duhet të jetë e ardhmja e kontinentit”, shtoi ai, duke vënë theksin mbi praktikat tregtare të pandershme që shkatërrojnë vendet e punës lokale.
“Prania në rritje e Rusisë në rajon është gjithashtu alarmante”, tha më pas Rex Tillerson, duke kritikuar se Moska i shet armë regjimeve jomiqësore që nuk respektojnë proceset demokratike. Shefi amerikan i diplomacisë, që mbajti këtë fjalim në Universitetin e Teksasit në Austin, do të zhvilloj një tur një javor në Meksikë, Argjentinë, Peru, Kolumbi dhe Xhamajkë. /kp/Telegrafi/