Trajneri i KF Llapit, Bylbyl Sokoli, është sulmuar fizikisht nga disa persona të dyshuar.
E gjitha ngjarja ka ndodhur rreth orës 20:30 në rrugën “Hajdar Dushi” në Prishtinë, pas humbjes së skuadrës së tij nga KF Prishtina me rezultat 2-1.
I menjëhershëm ka qenë edhe reagimi i tifozëve ulras të Llapit, Legjendat, të cilët thonë se janë në përkrahje të trajnerit dhe se ata nuk e kanë bërë.
Më poshtë keni reagimin e plotë të tyre:
“Ne si kryesi e ‘Legjendave’ duke parë se në media po qarkullojnë lajme se kryetrajneri i skuadrës, Bylbyl Sokoli, pas ndeshjes është rrahur nga disa persona, e pamë të arsyeshme të reagojmë me bindje të plotë se këtë gjest kriminal nuk e ka bërë tifozeria ‘Legjendat’ e asnjë nga anëtarët tanë”.
“Ata që po mundohen me përça klubin, LE TË LARGOHEN NGA KLUBI. Shërim të shpejtë Prof, ne jemi krenarë me ty dhe punën tënde, gjithmonë ne përkrahje!”
Kjo është humbja e dytë radhazi për Llapin pas asaj ndaj Feronikelit. Por, përkundër këtyre dy humbjeve, pas nëntë xhirove Llapi renditet i treti me 16 pikë. /Telegrafi/
