Liridon Krasniqi është njëri nga futbollistët më të famshëm në Malajzi.
Mesfushori kosovar u transferua në futbollin aziatik në vitin 2015, ndërsa falë paraqitjeve të mira ka bërë për vete një shtet të tërë.
Vitiasi ka luajtur më parë për Kedah dhe Melaka Utd, ndërsa ai tani i është bashkuar skuadrës kampione të shtetit Johor JDT.
Johor njihet si fuqi në futbollin e Malajzisë pasi në pesë vitet e fundit ka fituar katër herë titullin dhe po mendon për suksesin në Ligën e Kampionëve të Azisë.
Krasniqi është transferuar në klubin e pasur aziatik, por zyrtarizimi i tij pritet të bëhet gjatë ditëve të ardhshme, sapo presidenti i klubit miliarderi Tunku Ismail Idris të kthehet në vend për ta prezantuar.
Presidenti i Johor është njëri nga më të pasurit në Azi dhe ai njihet për shoqërimin me persona të famshëm si Andrea Agneli, Cristiano Ronaldo, Neymar, Mesut Ozil apo Lionel Messi.
Me të parë fotot e Liridonit me fanellë të Johorit, tifozët e klubit janë entuziazmuar në rrjetet sociale duke shkruar komente të shumta se tani duhet të fitohet Liga e Kampionëve të Azisë pasi e shohin kosovarin si një transferim tejet të madh.
Ata e kanë krahasuar yllin kosovar me atë portugez Cristiano Ronaldo që iu bashkua Juventusit me qëllimin e vetëm që të ketë sukses në Ligën e Kampionëve.
Edhe Johor është përforcuar me Krasniqin me të vetmin qëllim pasi dëshiron të lë shenjë edhe në Ligën e Kampionëve të Azisë.
27-vjeçari është njëri nga futbollistët më të mirë në elitën e futbollit të Malajzisë në vitet e fundit, ndërsa për të nuk kishin munguar as ofertat nga Evropa, por ai vendosi të qëndronte në Malajzi ku është shumë i dashur nga tifozët. /Telegrafi/
