Projekti ‘’Ti Barabartë Unë’’ edicionin e 5-të 3 Dhjetorin do ta shënojë me një videoklip ku do të jenë pjesëmarrës këngëtarë si: Sabri Fejzullahu, Shyhrete Behluli, Genta Ismajli, Nora İstrefi, Dhurata Dora, Tayna, 2Ton, Besnik Qaka NRG Band, Capital T, Majk dhe moderatori Labinot Gashi, të cilët do të jenë të shoqëruar nga persona me aftësi të kufizuara duke dhënë mesazhe përkrahëse për këtë kategori personash.
Organizatori i projektit, Shemsedin Sajhadi, thekson faktin se qëllimi i projektit në veçanti të videoklipit është sensibilizimi i shoqërisë, integrimi i personave me aftesi të kufizuar si dhe socializimi i tyre me personazhe publike të cilët dëshirojnë gjithmonë t’i takojnë idhujt e tyre nga afër.
Sajhadi shton se gjatë xhirrimeve artistët pjesëmarrës dhe personat me aftësi të kufizuar kanë kaluar çaste shumë të këndshme ku këta persona janë ndarë aq të kënaqur me rastin e takimit me idhujt e tyre sa që ka pasë interesim shumë të madh që të jenë të inkuadruar edhe shumë persona tjerë nga qytete të ndryshme. Duke qenë se minutazha e videoklipit është e kufizuar, është vendosur vetëm me 10 artistë, dhe personat me aftësi të kufizuar janë të përfshire nga të gjitha qytetet e Kosovës.
Videoklipi i realizuar do të lansohet më 3 dhjetor 2018 në Ditën Ndërkombëtare të Personave me Aftësi të Kufizuara, ku artistet pjesëmarrës dhe personat me aftësi të kufizuar, japin mesazhe përkrahëse për këtë kategori personash.
Ky klip do të lansohet në faqen e projektit ‘’Ti Barabarte Une’’ në Facebook, ndersa në YouTube përmes kanalit ‘’ArkivaShqip”, ku të gjitha përfitimet e klikimeve do t’iu dhurohen personave me aftësi të kufizuar. Ky klip gjithashtu do të jepet premierë edhe në ‘’ABİ Çarshia’’, në Prizren.
Me një shpërndarje të videoklipit dhe klikimm qytetarët do të jenë në gjendje të kontribuojnë personave me aftësi të kufizuar.
Sajhadi tregon se rrjedha e realizimit te videoklipit ka shkuar ashtu qysh është planifikuar duke inkuadruar yjet më të mëdhenj të Kosovës. /Telegrafi/