Të hënën është thirrur seancë e jashtëzakonshme për shkarkimin e Ardita Sinanit nga posti i Kryetares së Preshevës.
Kështu ka bërë të ditur, Sinani përmes një postimi në Facebook.
Por ajo thotë se nesër do të udhëtojë për në Prishtinë për takim me kryeministrin Albin Kurti.
Kështu, Sinani ka kërkuar që të shtyhet seanca për një kohë më të përshtatshme, meqë është e pamundur të jetë e pranishme fizikisht në ora 10.00 në Preshevë.
Ndërkaq, kryetari i Kuvendit të Preshevës, Sami Salihu, në bazë të kërkesës së këshilltarëve të opozitës, ka ftuar për ditën e hënë një seancë të jashtëzakonshme për shkarkimin e kryetares së Preshevës.
“Siç e dini, kryetari i Kuvendit të Preshevës, z. Sami Salihu, në bazë të kërkesës së këshilltarëve të opozitës, ka ftuar për nesër, ditën e hënë, me fillim në ora 10:00, seancë të jashtëzakonshme, me pikë të vetme të rendit të ditës: Shqyrtimi i propozimit për shkarkim të Kryetares së Komunës së Preshevës”.
“Duke qenë se si përfaqësues politikë nga Lugina e Preshevës jemi të ftuar nesër në takim në Prishtinë, në ora 8.00, nga Kryeministri i Republikës së Kosovës, z.Albin Kurti, ku kam konfirmuar pjesëmarrjen time, njoftoj opinionin publik se së bashku me z.Munir Rexhepi, Shef i Grupit të Këshilltarëve të Partisë për Veprim Demokratik në Kuvendin Komunal të Preshevës, kemi kërkuar sot nga kryetari i Kuvendit Komunal z.Sami Salihu, që ta shtyjë seancën për një kohë më të përshtatshme, meqë është e pamundur të jem e pranishme fizikisht në ora 10.00 në Preshevë”.
“Besoj në mirëkuptimin e kryetarit të Kuvendit, z.Sami Salihu, por edhe në përkrahjen e Këshilltarëve të tjerë Komunalë, për ta mundësuar praninë time në seancën ku është inicuar shqyrtim-propozimi për shkarkimin tim”, shkroi Sinani, njofton Telegrafi.
