Presidenti i Kosovës, Hashim Thaçi ka vizituar sot Qendrën Klinike Universitare të Kosovës. Ai para medieve vlerësoi lartë punën e gjithë punonjësve shëndetësor, të cilët i përgëzoi për punën që po bëjnë.
Thaçi tha se ka dëgjuar një raport nga mjekët, ku u bind se duhet të ketë besim të plotë në stafin mjekësor dhe kapacitetin e tyre.
“Shpreh mirënjohjen më të lartë për stafin, mjekët infermierët, teknik, çdo punëtor shëndetësor, çdo punëtor i QKUK-së për punën e mrekullueshme, sepse këto ditë janë heronjtë e Kosovës dhe shembulli më i mirë për rajonin. Natyrisht me këshillat e mjekëve edhe unë e kam respektuar protokollin strikt të institucioneve shëndetësore, dhe kam pasur lëvizje të kufizuar edhe gjatë vizitës. Kam dëgjuar një raport të detajuar nga mjekët, dhe besoj se puna e këtyre mjekëve duhet të ketë përkrahjen e të gjithëve”, tha Thaçi.
Ai bëri thirrje për kujdes maksimal në kohën e pandemisë COVID-19, dhe respektim të rekomandimeve të dhëna nga institucionet shëndetësore.
“Ju ftoj të tregoni kujdes maksimal, solidaritet të ndërsjellë për qetësi dhe përmbajtje. Jam i bindur që së bashku do ta tejkalojmë edhe këtë vështirësi, këtë të keqe. Dëgjoni dhe respektoni rekomandimet e IKSHPK-së. Mënyra më e mirë për të mposhtur COVID-19 është të rrini në shtëpi. Mos dilni pa nevojë, rrini në shtëpi”, tha presidenti. /Telegrafi/