Vetëm pak minuta pas konferencës që mbajti i janë dashur presidentit Hashim Thaçi, që të shkojë në njërin prej hoteleve në kryeqytet për ta takuar kryetarin e AKR-së, Behgjet Pacolli.
Klan Kosova ka siguruar fotografi prej takimit që aktualisht është duke u mbajtur aty.
Ky takim mes tyre ndodhë në kohën kur po synohet që të krijohet Qeveria e re, pjesë e së cilës nga AKR janë deklaruar se nuk do të jenë.
Ndryshe, presidenti i vendit, Hashim Thaçi ka thënë se ka pranuar sot Aktgjykimin e Gjykatës Kushtetuese lidhur me vlerësimin e kushtetutshmërisë së dekretit të tij ku propozoi Avdullah Hotin si kandidat për kryeministër.
Thaçi në një konferencë për media, ka thënë se e mirëpret përfundimin e këtij procesi politik e juridik.
“U dëshmua se në Kosovë është pjekur demokracia dhe se funksionojnë me sukses institucionet e pavarura. Tashmë është hapur rruga për formimin e Qeverisë së re të Kosovës, shpresoj se do të jetë kapitull i ri për stabilitet dhe zhvillim”, ka thënë Thaçi.
Presidenti Thaçi ka theksuar se ka qenë i kujdesshëm që çdo hap që ka ndërmarr të jetë në përputhje me Kushtetutën.