Kryetari i PDSH, Menduh Thaçi, sot në selinë e partisë në Tetovë është takuar me shefin e Misionit të OSBE/ODIHR, Jan Petersen, me të cilin ka biseduar për krizën politike dhe për organizimin e proceseve zgjedhore, transmeton Telegrafi Maqedoni.
Në njoftimin e partisë thuhet se Thaçi ka potencuar që një nga prioritetet e PDSH është organizimi i zgjedhjeve të lira dhe demokratike, me qëllim të vetëm, siç thuhet, për mënjanimin e parregullsive, siç janë mbushja e kutive dhe falsifikimi i rezultateve zgjedhore.
Thaçi ka kërkuar përkrahje nga faktori ndërkombëtar për garantimin e zgjedhjeve të lira, demokratike dhe të besueshme, kurdo që të mbahen ato.
Siç thuhet në njoftim, lideri i PDSH ka theksuar që brenga kryesore e partisë është partizimi i institucioneve dhe kërcënimet ndaj qytetarëve.
Dy bashkëbiseduesit kanë shprehur besim që bashkëpunimi mes tyre do të vazhdojë edhe në të ardhmen./Telegrafi/