Presidenti i Kosovës, Hashim Thaçi ka thënë se nuk do të marr pjesë në proceset negociuese që udhëhiqen nga përfaqësuesi i posaçëm i Bashkimit Evropian (BE) në dialogun Kosovë-Serbi, Miroslav Lajçak.
Thaçi këtë deklaratë e tha pas një vizite që ia bëri Odës Ekonomikë të Kosovës (OEK).
“Është inkurajues çdo vullnet nga Bashkimi Evropian në këtë drejtim. Por, personalisht, nuk jam në kontakt me Lajçakun, pasi Kurti që tre muaj është në kontakt me të dhe nuk e di sa larg kanë shkuar bisedimet, Lajçak-Kurti-Borrell. Duhet të jemi të vetëdijshëm që jemi vend i pavarur dhe demokratik dhe përball kemi dy negociator që nuk e kanë njohur pavarësinë e Kosovës”, ka thënë ai.
Thaçi u shpreh se si president do t’i përgjigjet ftesave e samiteve që udhëhiqen nga Merkel, Macron, etj.
“Personalisht, si president do t’i përgjigjem ftesave nëpër samite që udhëhiqen nga Merkel, Macron, etj, por nuk e kam vullnetin që të participojë në procese të negociatave që udhëhiqen nga Lajçaku”, ka thënë ai.
Ai shprehu besim të plotë në lidershipin e SHBA-së, për përmbylljen e suksesshme të dialogut. “Kam besim të plotë në lidershipin e SHBA-së, ata do ta përmbyllin suksesshëm dialogun. Pa rol udhëheqës të SHBA-së nuk ka faktor që i lëviz këto gjëra”, ka thënë ndër të tjera presidentit i vendit, Hashim Thaçi. /Telegrafi/