Presidenti i Kosovës, Hashim Thaçi, në ditën e parë të vizitës së tij zyrtare në Republikën e Sllovenisë, është pritur nga homologu i tij, Borut Pahor, me ç’rast është shprehur se Kosova, pas konsolidimit në planit politik, tani ka kthyer vëmendjen nga zhvillimi ekonomik.
“Është kënaqësi që vizitën time të parë bilaterale, si president i Republikës së Kosovës, po e bëj në Slloveni. Është veçanërisht kënaqësi që jam këtu pak para se të shënoni 25-vjetorin e pavarësisë së Sllovenisë. Më lejoni që t’ju uroj të gjithëve, qytetarëve të Sllovenisë, presidentit të Sllovenisë, Qeverisë dhe Parlamentit me rastin e shënimit të kësaj date të rëndësishme për shtetin slloven”, ka thënë presidenti Thaçi gjatë takimit me presidentin slloven, Borut Pahor.
I pari i vendit theksoi se Sllovenia ka qenë dhe do të jetë gjithmonë përkrahëse dhe mike e Kosovës dhe se dy shtetet gëzojnë marrëdhënie shembullore bilaterale, gjë të cilën, tha ai, e dëshmon nënshkrimi i njëmbëdhjetë marrëveshjeve për bashkëpunim politik, ekonomik dhe kulturor.
“Sllovenia është investitorja e dytë më e madhe në Kosovë. E falënderoj presidentin Pahor dhe Qeverinë e Sllovenisë për mbështetjen e vazhdueshme për Kosovën, edhe tani kur mbetemi të përkushtuar për forcimin e subjektivitetit të shtetit tonë përmes njohjeve të reja dhe anëtarësimit në organizata shumëpalëshe ndërkombëtare”, ka thënë presidenti Thaçi.
Ai tha se Kosova është konsoliduar si shtet, në planin e brendshëm dhe atë të jashtëm, se pjesa veriore e vendit është integruar, dhe shtoi se vendi po shënon rritje të vazhdueshme ekonomike.
Po ashtu, presidenti Thaçi rikujtoi se Qeveria ka përgatitur Ligjin për Investime Strategjike, si dhe veçoi nënshkrimin e Marrëveshjes së Stabilizim Asociimit, rekomandimin për liberalizim të vizave si dhe marrjen e statusit të kandidatit për fondet e Korporatës Sfidat e Mijëvjeçarit (MCC), si dëshmi e reformave në ekonomi, politikë dhe në sundimin e ligjit.
Presidenti Thaçi theksoi se vendi është në prag të themelimit të Forcave të Armatosura të Kosovës.
Ai gjithashtu theksoi se Kosova mbetet lidere në rajon për sa i përket luftimit të ekstremizmit të dhunshëm dhe terrorizmit, duke thënë se vendi e meriton anëtarësimin në Interpol.
Gjithashtu, presidenti Thaçi tha se Kosova mbetet faktor stabiliteti në rajon, gjersa dialogu me Serbinë ka reflektuar pozitivisht në mbarë Ballkanin Perëndimor.
“E ardhmja e rajonit është në NATO dhe në BE”, ka thënë presidenti i Kosovës, Hashim Thaçi, gjatë takimit me homologun e tij slloven, Borut Pahor, në Lubjanë.
Presidenti Thaçi, gjatë vizitës në Slloveni, është pritur për drekë zyrtare nga kryeministri i Sllovenisë, Miro Cerar.
Gjatë pritjes dhe në diskutimet gjatë drekës u bisedua për mundësitë e themelimit të bashkëpunimit ekonomik në mes dy vendeve.
Qeveria e Kosovës ka hartuar Ligjin për Investime Strategjike që do t’u mundësojë investitorëve që të realizojnë më shpejt projektet e tyre.
“Sllovenia është investitorja e dytë më e madhe në Kosovë. Ky besim është ftesë për bizneset e tjera, sllovene por edhe nga e tërë bota, që të vijnë të investojnë në Kosovë”, u shpreh presidenti Thaçi.
Presidentin Thaçi në Lubjanë e ka pritur edhe kryebashkiaku i Lubjanës, Zoran Jankoviq, i cili i tregoi presidentit Thaçi për sukseset e Lubjanës në përmirësimin e jetës së qytetarëve të kryeqytetit.
Presidenti Thaçi u shpreh se sikur që Sllovenia është shembull për rajonin ashtu edhe Lubjana duhet të jetë shembull për Prishtinën. Ai e përgëzoi Lubjanën për marrjen e çmimit nga Komisioni Europian si “Kryeqyteti i Gjelbër”.
Në fund, Presidenti i Republikës së Kosovës, Hashim Thaçi, u nënshkrua edhe në “Librin e Artë të Qytetit të Lubjanës”.