Presidenti i Kosovës, Hashim Thaçi, mori sot pjesë në përurimin e aeroportit më të madh në botë në Stamboll, me ç’rast pati një takim me homologun e tij turk Recep Tayyip Erdogan.
Thaçi me këtë rast uroi Erdogan për shënimin e Ditës së Republikës së Turqisë.
“Me liderë shtetesh në përurimin e Aeroportit të Ri të Stambollit, i cili pritet të shndërrohet në aeroportin më të madh në botë. Në emër të qytetarëve të Kosovës, presidentin Erdoğan e urova edhe për Ditën e Republikës së Turqisë”, ka shkruar Thaçi në Facebook.
Në mesin e mysafirëve që morën pjesë në këtë ceremoni ishin presidentë të tjerë nga vendet e rajonit, Ilir Meta i Shqipërisë, Aleksandar Vuçiq i Serbisë…
Ndryshe, aeroporti i ri i Stambollit, i cili tani është i hapur pas fazës së parë të ndërtimit, do të përfundojë plotësisht, me të gjitha përmbajtjet e tij, deri në vitin 2028.
Aeroporti i ri i Stambollit është projektuar të jetë më i madhi në botë dhe do të jetë në gjendje të pranojë 200 milionë pasagjerë në vit.
Ai është hapur në shënimin e 95-vjetorit të Ditës së Republikës së Turqisë.
Vlera e projektit është rreth 10 miliardë euro dhe shteti do të marrë të ardhura nga koncesioni më shumë se 30 miliardë euro së bashku me tarifat e mbledhura.
Aeroporti i Ataturkut do të mbyllet për fluturime të rregullta pasagjerësh kur aeroporti i ri i Stambollit të jetë plotësisht funksional, dhe do të përdoret për nevoja të tjera. /Telegrafi/