Presidenti i Kosovës, Hashim Thaçi, në kuadër të Samitit të SEECP-së, ka zhvilluar një takim përfaqësuesen e Lartë të Bashkimit Evropian për Punë të Jashtme dhe Politika të Sigurisë, Federica Mogherini.
Thaçi përmes një postimi në Facebook, ka bërë të ditur se nga Mogherrini ka kërkuar një prezencë më të madhe të BE-së në rajon, një qartësi dhe një perspektivë më të sigurt për integrimin e shteteve të Ballkanit Perëndimor në BE.
“BE-ja është korniza e vetme për modernizmin e shoqërive tona, për demokratizimin e shteteve dhe për garantimin e zhvillimit ekonomik”, ka shkruar Thaçi, transmeton Telegrafi.
Ndryshe, gjatë Samitit SEECP, shefja e diplomacisë së Bashkimit Evropian, është shprehur e bindur se dialogu ndërmjet Prishtinës dhe Beogradit do të rifillojë.
“Dialogu duhet të vazhdojë dhe marrëveshjet duhet të zbatohen. Pres zhvillimet të reja nga dialogu mes dy vendeve”, citohet të ketë thënë Mogherini.
Duke folur për integrimin e dy vendeve në Bashkimin Evropian, dhe njohjen e ndërsjellë, Mogherini tha se ka parë angazhim te të dyja shtetet. /Telegrafi/