Përfaqësuesja e Kosovës ka shënuar fitore me rezultat 2-0 kundër Ishujve Faroe.
Në mesin e 13 mijë tifozëve që ishin mbledh në stadiumin “Fadil Vokrri” në Prishtinë, për t’i dhënë mbështetje Përfaqësueses së Kosovës, ishin edhe presidenti Hashim Thaçi dhe kryeministri Ramush Haradinaj.
Presidenti Thaçi pas përfundimit të ndeshjes ka uruar futbollistët dhe të gjithë qytetarët, duke thënë se Kosova me plotë meritë e fitoi këtë ndeshje.
“Fitore madhështore! Kosova me plot meritë e fitoi ndeshjen e parë zyrtare ndërkombëtare në stadiumin modern “Fadil Vokrri”. Një fitore historike kjo, e cila vetëm sa u hapi rrugë sukseseve të pandalshme të futbollistëve tanë të mrekullueshëm, që sonte na dhanë shumë emocione. Krenar me përfaqësuesen tonë! “, ka shkruar Thaçi në Facebook.
Edhe kryeministri Ramush Haradinaj ka uruar Përfaqësuesen e Kosovës për fitoren e tyre ndaj Ishujve Faroe. “Urime Kosovë”, ka qenë urimi i shkurt i kryeministrit Haradinaj.
Urimi nuk ka munguar as nga kryeparlamentari Kadri Veseli.
” Një fitore e merituar. Një fitore për Fadil Vokrrin. Një fitore dhe spektakël për gjeneratat që punuan shumë për këto ditë dhe për rininë tonë. #Kosova”, ka shkruar Veseli.
Pas këtij triumfi, Kosova numëron katër pikë dhe është në krye të Grupit 3 në ligën D. /Telegrafi/