Site icon Telegrafi

Thaçi: FSK-ja është e gatshme të bëhet pjesë e NATO-s

Xhejlane Kaçiu

Presidenti i Republikës së Kosovës, Hashim Thaçi, është pritur sot nga Zëvendëssekretari i Mbrojtjes, David Norquist.

Thaçi u shpreh i kënaqur me mbështetjen e SHBA-së për themelimin e ushtrisë së Kosovës dhe kërkoi që të rritet bashkëpunimi edhe më shumë.

Presidenti falënderoi Zëvendëssekretarin e Mbrojtjes për pritjen dhe theksoi se është thelbësore për stabilitetin e rajonit që Kosova t’i bashkohet NATO-s.

“I jemi mirënjohës SHBA-ve për mbështetjen e madhe që i jep FSK-së dhe rrugën tonë. Faleminderit Zëvendëssekretarit të Mbrojtjes, David L. Norquist për një takim të frytshëm dhe angazhimin e Pentagonit për ushtrinë tonë, të gatshme për të shërbyer përkrah aleatëve tanë të NATO-s. Është thelbësore për sigurinë dhe stabilitetin e rajonit që Kosova t’i bashkohet NATO-s”, shkruan Thaçi në Twitter.

Gjatë takimit, Thaçi bëri të ditur se Kosova tashmë e ka të gatshme ushtrinë profesionale dhe me standarde të NATO-s.

“Kosova e ka ushtrinë e vet, profesionale dhe me standarde të NATO-s, që është e gatshme të përfshihet në misionet humanitare e paqeruajtëse në botë, krah për krah me Shtetet e Bashkuara të Amerikës”, u shpreh Thaçi.

Në anën tjetër, Zëvendëssekretari i Mbrojtjes, David Norquist, ka theksuar se është vitale për sigurinë në Evropën Juglindore që Kosova të jetë sa më shpejtë anëtare e NATO-s.

Ai po ashtu shkroi se do të vazhdojnë ta përkrahin zhvillimin e FSK-së, dhe të kontribuojnë në normalizimin e marrëdhënieve Kosovë – Serbi.

“Ishte nderë të takohesha me Presidentin e Republikës së Kosovës, Hashim Thaçin sot gjatë ditës në Pentagon. Departamenti i Mbrojtjes vazhdon të mbështes zhvillimin e Forcës së Sigurisë së Kosovës dhe të përkrahë normalizimin e marrëdhënieve të Kosovës e Serbisë”, shkruan Norquist.

Exit mobile version