Presidenti i Republikës së Kosovës, Hashim Thaçi, është takuar me deputetin e Parlamentit të Kanadasë, Borys Wrzesnewskyj, njëherësh kryesues i Asociacionit Parlamentar të NATO-s në Kanada, me të cilin bisedoi për bashkëpunimin e Kosovës dhe Kanadasë, veçanërisht në sektorin e sigurisë.
Sipas njoftimit për media, Presidenti Thaçi u shpreh i kënaqur që Kosova dhe Kanadaja këtë vit shënojnë 10 vjetorin e marrëdhënieve diplomatike në mes dy vendeve dhe përkrahjen e vazhdueshme që Kanadaja i ka dhënë Kosovës.
“Jemi mirënjohës për mbështetjen që na keni dhënë në të gjitha fazat. Tani po punojmë për forcimin e paqes dhe për stabilitetin e qëndrueshëm. Është njësoj e rëndësishme të përkrahet Kosova edhe tani, veçanërisht në përpjekjet për të arritur marrëveshjen e përhershme paqësore me Serbinë dhe në transformimin e FSK-së në forcë të gatshme për t’u bërë anëtare e NATO-s. Kosova është e qartë se të ardhmen e sheh në NATO dhe BE”, ka thënë Thaçi.
Deputeti Wrzesnewskyj theksoi se e njeh mirë rrugën e vështirë dhe tragjike të Kosovës dhe se e kupton rëndësinë e sigurisë së përgjithshme.
“Është inkurajues zhvillimi i deritashëm i Kosovës në përgjithësi dhe zhvillimi i FSK-së në veçanti”, theksoi deputeti Wrzesnewskyj. /Telegrafi/