Presidenti i Kosovës, Hashim Thaçi, ka pritur sot në takim një delegacion të Gardës Kombëtare të Iowa-s, të prirë nga gjeneralmajori Timothy Orr.
Thaçi ka falënderuar gjeneralmajorin Orr për mbështetjen që i ka dhënë Kosovës përmes partneritetit ndërmjet Kosovës dhe Iowa-s , që filimisht ishte përqendruar në bashkëpunim ushtarak.
“Ky bashkëpunim u zgjerua shumë shpejt në fusha të tjera. Sot, partneriteti ndërmjet Kosovës dhe Iowa-s është shndërruar në një model për të gjithë. Ky bashkëpunim është rritur edhe falë angazhimit tuaj të drejtpërdrejtë”, ka thënë Thaçi.
Ai ka shtuar se si President i Kosovës do të mbështes çdo projekt dhe ide që del nga ky partneritet.
Ndërkaq, gjeneralmajori i Gardës Kombëtare të Iowa-s, Timothy Orr, ka thënë se Kosova është vendlindja e tij e dytë. “Ajo që kemi arritur për pesë vjet të partneritetit ndërmjet Kosovës dhe Iowa-s është e jashtëzakonshme. Por, pa mbështetjen tuaj zoti president, ky sukses nuk do të ishte kaq i madh”, ka thënë gjeneralmajori Orr.
Për kontributin e jashtëzakonshëm në fushën e sigurisë, Presidenti i Republikës së Kosovës, Hashim Thaçi, ka dekoruar gjeneralmajorin Timothy Orr me Medaljen Presidenciale të Meritave./Telegrafi/