Ditën e sotme është kryer testimi i pajisjeve të identifikimit elektronik dhe votimit elektronik për zgjedhjet e 14 majit në Shqipëri, ku kreu i Komisionit Qendror të Zgjedhjeve (KQZ), Ilirjan Celibashi tha se ky test ka shkuar shumë mirë.
Në fjalën e tij për mediat, Celibashi theksoi se është e garantuar 100 për qind fshehtësia e votës. Në vijim të kësaj deklarate, kryekomisioneri shtoi se nuk ka asnjë mënyrë për të verifikuar se për kë parti apo kandidat shkon vota.
“Procesi ka shkuar shumë mirë. Funksionaliteti i pajisjeve në përputhje me manualet. Po testojmë dhe procesin e transmetimit të të dhënave pas votimit. Pajisjet kanë përmbushur kërkesat e KQZ nga ana teknike për sigurinë dhe garancinë e procesit të votimit dhe fshehtësisë së votës. Fshehtësia e votës e çdo qytetari kur votojnë nëpërmjet pajisjes së votimit elektronik është 100 për qind e sigurt dhe nuk ka asnjë mënyrë për të verifikuar se për ka votuar X apo Y votues. Kjo është 100 për qind e sigurt”, u shpreh ai.
Ai është ndalur edhe te vota e emigrantëve, ku tha se po punohet që të jetë e mundur brenda 2025. Për këtë arsye i bëri thirrje partive politike që me të përfunduar këto zgjedhje, të ulen në tryezë dhe të diskutojnë dhe të përfundojnë Reformën Zgjedhore.
“Dua që 2025 të mundësojmë që votimin e shqiptarëve që votojnë jashtë Shqipërisë, është një proces me shumë të panjohura, me rëndësi që partitë politike brenda këtij viti të përfundojnë reformën zgjedhore”, tha Celibashi.
Identifikimit elektronik dhe votimi elektronik do të bëhet në tre, Elbasan, Vorë dhe Kamëz e ku rezultati pritet që të dalë brenda 30 minutave. /Telegrafi/