Ambasadorja turke në Kosovë, Kivilcim Kilic, tha sot se tentimi për grusht-shtetin e vitit të kaluar në Turqi kishte për qëllim mposhtjen e institucioneve demokratike dhe se ky sulm ishte prej me të këqijve në historinë e shtetit.
Ajo këto komente i bëri sot në një konferencë për media të organizuar nga Ambasada e Turqisë në njëvjetorin e tentimit për grusht-shtet në Turqi.
Për këtë ngjarje është paraqitur edhe një video ku paraqiteshin skenat e tentimit të grusht-shtetit të vitit të kaluar.
Diplomatja turke tha se atë natë ishte dëshmitare e kësaj ngjarje. Sipas saj edhe pse ka kaluar një vit nga grusht-shteti i dështuar, ende po punojnë për të kaluar këtë.
Sipas ambasadores Kilic tentimi i grusht-shtetit vitin e kaluar ishte akti terrorist më i përgjakshëm ndonjëherë.
“15 korriku ishte një sprovë e demokracisë për shtetin turk. 15 korriku është fitorja e demokracisë turke”, tha ajo.
Ambasadorja ka thënë se i tërë ky akt është nga organizata e Fetullah Gylen, të cilën Ankaraja zyrtare e konsideron organizatë terroriste.
Kilic tha se 78 lëndë gjyqësore janë në procedurë dhe që të gjitha faktet tregon se prapa saj qëndron organizata FETO, e cila është e pranishme në 170 vende. Sipas saj, FETO është e pranishme edhe në Kosovë.