Nata e kaluar ka qenë shumë e zhurmshme në Modena të Italisë, kur plaçkitësit tentuan të futen në një mjet të blinduar dhe të vjedhin para dhe gjësende tjera me vlerë.
Siç raporton agjencia Ansa, plaçkitësit si në skenat e filmave aksion, fillimisht bllokuan autostradën në jug në dalje të Modenas, duke hedhur gozhda në rrugë për të bllokuar trafikun, ndalën dy vetura nën kërcënimin e armëve të cilëve ua vunë zjarrin – më pas ndalën edhe dy kamionë që i vendosën në mënyrë diagonale – si barrikadë, transmeton Telegrafi.
Sulmi dhe plaçkitja nuk pati edhe aq sukses, pasi siç ka njoftuar policia, nuk ka pasur viktima dhe të lënduar – pavarësisht që dëshmitarët thonë se kanë dëgjuar shpërthime dhe të shtëna armësh.
Tymi dhe zjarri i mjeteve të djegura ka mundur të shihet nga dhjetëra kilometra. Në shikim të parë dukej sikur pasojat ishin të mëdha – kështu aksioni i policisë me helikopter dhe autoambulanca e bëri para syve të qytetarëve edhe më të frikshëm.
Megjithatë, plaçkitësit kanë arritur të ikin nga vendi i ngjarjes, e policia italiane është duke punuar në lokalizimin e tyre. Për shkak të kësaj tentim-plaçkitjeje mes Bolonjës dhe Modenas, trafiku për disa orë ka qenë i bllokuar. /Telegrafi/
