Irani ka paralajmëruar Izraelin kundër përshkallëzimit, pas rritjes së tensioneve midis tij dhe Hezbollahut në Liban.
Në një deklaratë të lëshuar nga zëdhënësi i Ministrisë së Jashtme, Nasser Kanaani, Irani tha se Izraeli “duhet të jetë i mençur për të shmangur atë që e quajti aventurë të re” në Liban.
Bëhet e ditur se Irani mbështet grupin Hezbollah, së bashku me një numër grupesh të tjera militante në Lindjen e Mesme.
Ndryshe, së fundmi ushtria izraelite ka njoftuar se ka goditur objektivat e Hezbollahut “thellë brenda territorit libanez”, duke sulmuar depo të armëve dhe “infrastrukturën terroriste”, shkruan skynews, përcjell Telegrafi.
Ky sulm vjen pas paralajmërimit të kryeministrit izraelit, Benjamin Netanyahu, se grupi militant libanez Hezbollah “do të paguajë një çmim të rëndë” për një sulm në një fushë futbolli në Lartësitë Golan që vrau të paktën 11 fëmijë dhe adoleshentë.
Izraeli fajësoi Hezbollahun për sulmin në rajonin e kontrolluar nga Izraeli, por Hezbollahu nxitoi ta mohonte akuzën – diçka që e bën rrallë.
Sulmi në Lartësitë Golan thuhet të jetë më vdekjeprurësi ndaj civilëve izraelitë që kur luftëtarët e Hamasit kaluan me paraglide mbi kufirin nga Gaza në jug të Izraelit për të kryer masakrën e 7 tetorit. /Telegrafi/