Tenistët Hyda Banjska, Granit Bajraliu, Gurash Hasani dhe Meldin Mustafi do ta përfaqësojnë Kosovën në fazën e grupeve të “Davis Cup”, që është gara më e madhe ekipore në konkurrencën e meshkujve.
Përfaqësuesja e Kosovës në këtë garë udhëhiqet nga trajneri Jeton Hadërgjonaj dhe bën pjesë në kategorinë e tretë të Evropës.
Në këtë kategori garohet për plasman në kategorinë e dytë për sezonin e ardhshëm. Vetëm përfaqësueset e kategorisë së parë luftojnë për trofeun e çmueshëm, shkruan sot Koha Ditore.
Kosova kundërshtarët do t’i mësojë gjatë ditës së martë (sot), ka bërë të ditur kreu i Federatës së Tenisit të Kosovës, Shkëlzen Domi, të hënën.
Grupet do të formohen me nga katër përfaqësuese në bazë të rangimit. Kosova ka rangimin me të dobët dhe kundërshtarët e mundshëm të tenistëve kosovarë në “Davis Cup” mund të jenë Moldavia, Irlanda, Qipro, Estonia, Maqedonia, Mali i Zi, Malta, Greqia, Lihtenshtajni, San Marino, Armenia dhe Islanda.