Një video që është publikuar së fundmi në internet, shfaq momentin kur një grua e cila është abuzuar vazhdimisht, arrin t’i lë një copë letër punonjëses së një ordinance të një veterineri që ishte në banak, në të cilën shkruante se i dashuri e ka kërcënuar me vdekje, dhe se ato patjetër duhet t’i telefonojnë policisë pa e kuptuar ai.
Incidenti ka ndodhur më 28 maj në Florida, kur 28-vjeçarja Caroline Reichle dhe i dashuri i saj Jeremy Floyd, vizituan veterinerin pasi qeni i tyre kishte nevojë për tretman, transmeton Telegrafi.
Në video shihet gruaja, fytyra e të cilës është mbuluar për të mbrojtur identitetin e saj, duke u futur dhe afruar në banak të punonjëset të cilave ua lë në dorë një copë letër në të cilën shkruante: “Telefononi policisë. I dashuri po më kërcënon. Ai ka revole me vete. Të lutemi bëjeni këtë pa e kuptuar ai”.
Më pas ajo largohet sikur të mos kishte ndodhur asgjë, dhe futet në dhomën e pritjes së bashku me të dashurin që mbante në dorë qenin. Aty menjëherë punonjëset e kuptuan se për çfarë bëhej fjalë dhe i telefonuan policisë.
Pas disa sekondave në video shihen policët duke u futur në dhomën e pritjes, ku i kërkojnë 39-vjeçarit Floyd të ngritet në këmbë për ta kontrolluar. Aty i gjejnë revolen në brez dhe menjëherë e prangosin.
Mediat amerikane raportojnë se Reichle ishte rrahur për ditë të tëra nga i dashuri, që përfundoi prapa grilave pas letrës që e lexuan punonjëset e ordinancës. /Telegrafi/
