(E plotësuar) Presidenti i Burkina Fasos, Roch Marc Christian Kabore, është arrestuar në kryeqytetin, Ouagadougou, nga ushtarët rebelë, raportuan agjencitë e lajmeve dhe mediat të hënën.
Sipas mediave të huaja, përcjell Telegrafi, të shtëna u dëgjuan të dielën vonë pranë shtëpisë së Kabore pasi ushtarët organizuan kryengritje në disa kazerma për të kërkuar shkarkimin e udhëheqësve të ushtrisë së vendit dhe më shumë burime për betejën kundër kryengritësve islamikë.
Banorët gjithashtu raportuan se panë një helikopter mbi shtëpinë e presidentit në kryeqytetin Ouagadougou.
Një gjë e tillë pasoi të shtënat me armë zjarri më herët të dielën në disa baza të ushtrisë, duke shkaktuar frikën për një tjetër grusht shteti në një vend të paqëndrueshëm të Afrikës Perëndimore të prirur për “pushtime ushtarake”. /Telegrafi/
Të shtëna armësh pranë pallatit presidencial në Burkina Faso
Të shtëna armësh janë dëgjuar pranë pallatit presidencial në kryeqytetin e Burkina Faso, mes një rebelimi nga ushtarët.
Sipas mediave të huaja, përcjell Telegrafi, të shtëna me armë janë dëgjuar gjithashtu në disa kazerma në Ouagadougou, me ushtarë që kërkojnë shkarkimin e shefave ushtarakë dhe më shumë burime për të luftuar islamistët militantë.
Si pasojë, qindra njerëz dolën në mbështetje të trupave, duke detyruar autoritetet të vendosin një shtetrrethim gjatë natës.
Qeveria tha se kriza ishte kontrolluar.
Ajo hodhi poshtë thashethemet për një përpjekje të re për grusht shteti, pak më shumë se një javë pasi 11 ushtarë u arrestuan për gjoja komplot për një veprim të tillë.
Kjo është shenja e fundit e pakënaqësisë në rritje me qeverinë e presidentit Roch Kaboré për dështimin e saj për të shuar kryengritjen islamike që ka shkatërruar shtetin e Afrikës Perëndimore që nga viti 2015. /Telegrafi/