Përzgjedhësi i Argjentinës, Lionel Scaloni, ka folur për të ardhmen e tij, duke e konfirmuar se do të vazhdojë të drejtojë kampionët e botës.
45-vjeçari ka fituar Kupën e Amerikës (2021) dhe Kupën e Botës (2022) deri tani me Albicelestët, duke u kthyer në një trajner të kërkuar.
Scaloni ka kontratë deri në dhjetorin e vitit 2026 me Argjentinën dhe do të vazhdojë ta drejtojë ekipin kombëtar.
“Është folur shumë për këtë temë, por unë kam thënë gjithmonë të vërtetën. Mora një moment për të menduar dhe kuptuar se çfarë të bëja. Nuk ishte lamtumirë apo diçka e tillë. Po mendoja se si do të vazhdojë historia ime me Argjentinën”.
“Për ne është gjithashtu e rëndësishme të kuptojmë se kur është koha për t’u dhënë hapësirë të rinjve. Ishte vetëm një moment reflektimi”, ka thënë Scaloni.
Në fund natyrisht përzgjedhësi u ndal edhe te lojtari kryesor, Lionel Messi, duke thënë se ai do të luajë derisa të dojë.
“Ai do të vazhdojë me Argjentinën derisa të dojë. Leo luan ende, mbi të gjitha sepse është i lumtur në fushë. Për të do të jetë edhe më e vështirë të tërhiqet”.
“Për të gjithë ne do të jetë e vështirë të mos e shohim më duke luajtur”, ka thënë ai. /Telegrafi/