Qyteti për të Drejtat e Njeriut është iniciativë e Shulamith Koenig dhe Lëvizjes për Edukimin për të Drejtat e Njeriut.
Kjo nismë është propozuar në Konferencën Globale për të Drejtat e Njeriut në vitin 1993 në Vienë, Austri, derisa Rosario në Argjentinë është Qyteti i Parë për të Drejtat e Njeriut në botë i shpallur në vitin 1997.
Graci, në Austri, u bë Qyteti i parë Evropian për të Drejtat e Njeriut në vitin 2001 dhe Washington DC në vitin 2008 shpallet Qyteti i parë për të Drejtat e Njeriut në SHBA. Shumë qytete në Bashkimin Evropian dhe në botë, tani gëzojnë statusin e Qytetit për të Drejtat e Njeriut.
Kur do të shpallet qyteti i parë për të Drejtat e Njeriut në Kosovë?
Aktivistët për të Drejtat e Njeriut nga Evropa dhe SHBA sugjerojnë se Kosova mund të filloj përgatitjet për shpalljen e qytetit për të Drejtat e Njeriut! Kjo mundësi do ju ofrohet të gjitha qyteteve, por cili do të jetë qyteti i parë për të Drejtat e Njeriut në Kosovë?
Edukimi për të Drejtat e Njeriut – EDNj në Kosovë ka shënuar ngecje, për më tepër aktivistët dhe edukatorët për të drejtat e njeriut shpesh janë përbuzur, etiketuar dhe kërcënuar gjatë punës së tyre. Kosova duhet të ofrojë mbështetje për organizatat dhe mbrojtësit e të drejtave të njeriut. Ky është edhe një ndër kushtet themelore për integrimin e Kosovës në Bashkimin Evropian!
Raporti i publikuar me 11 Tetor, 2021 nga Agjencioni i Bashkimit Evropian për të Drejtat e Njeriut na mëson dhe udhëzon si të formojmë qytetin për të Drejtat e Njeriut!
“Qeveritë kombëtare dhe lokale janë bartës të detyrave dhe ato janë përgjegjëse për implementimin e detyrimeve për të Drejtat e Njeriut. Këto detyrime lidhin të gjitha format e qeverisjes vendore në zonat urbane ose rurale, pavarësisht nga madhësia e tyre dhe varen nga fuqitë që këto qeverisje vendore kanë në fusha të ndryshme në veçanti në arsim, shëndetësi, çështjet sociale ose strehim.” Cili do të jetë qyteti i parë për të Drejtat e Njeriut në Kosovë?
Dr. Neshad Asllani
Qendra Kosovare për të Drejtat e Njeriut
Sa më shumë dimë për të Drejtat tona aq më pak do t’i shkelim të drejtat e të tjerëve! /Telegrafi/