Qytetarët nuk duan as të dëgjojnë që të shkojnë në pension më vonë. Sindikatat shprehen se masa e këtillë nuk do ta zgjidh, por do ta përkeqësojë gjendjen në sistemin pensional. Reagimet vijnë pasiqë një ditë më parë kryeministri Zoran Zaev në Kuvend paralajmëroi se ndoshta do të duhet të bëhet një hap i këtillë jopopullor.
Sipas kryetarit të Sindikatës së Industrisë, Energjisë dhe Minierave, Pece Risteski në dhjetë vitet e ardhshme nuk ka arsyetim për të prekur pragun për pension, duke marrë parasysh faktin se ekzistojnë mundësi tjera si arkëtimi më efikas i kontributeve.
Qytetarët të anketuar nga Alsat-M, nuk pajtohen me idenë që të shkojnë më vonë në pension.
Paralajmërimin e kryeministrit Zaev sot e kritikuan edhe nga OBRM-PDUKM-ja. Sipas partisë opozitare, zhvendosja e pragut të pensionimit dhe rritja e kontributeve do të ishte goditje ndaj ekonomisë, punëdhënësve dhe punëtorëve.
Nga Ministria e Punës dhe Politikës Sociale shprehen se bashkë me Ministrinë e Financave janë duke përgatitur një plan afatmesëm dhe afatgjatë, me qëllim që Fondi të bëhet i qëndrueshëm dhe i pavarur nga buxheti.
Vrima në Fondin Shtetërorë Pensional vazhdimisht thellohet. Sivjet ajo do të arrijë rreth gjysmë miliard euro, fonde këto që do të sigurohen nga buxheti shtetëror./alsat/
