Të enjten nga ora 20:00 në Pallatin e Rinisë dhe Sportit në kryeqytet zhvillohet ndeshja e dytë finale e ‘play-offit’ të Superligës së Kosovës në hendboll (meshkujt). Takohen Prishtina e Besa Famgas, dy skuadrat kryesore të këtij edicioni.
Ndeshjen e parë të luajtur të shtunën në Pejë e kishte fituar Besa me rezultat 38-30. Kështu skuadra pejane vjen në Prishtinë për ta festuar titullin e kampionit.
Besës në ndeshjen e dytë i duhet fitore apo barazim për ta siguruar titullin e radhës. Besa Famgas ka dominuar plotësisht këtë edicion, duke shënuar 31 fitore rresht.
Prishtina ishte e dyta, derisa në gjysmëfinale e kaloi Trepçën.
Prishtinasit kanë plane tjera për ndeshjen e dytë. Synojnë të japin më të mirën për të barazuar rezultatin në 1-1 dhe kështu të sigurojnë ndeshjen e tretë finale të ‘play-offit’.
Pritet ndeshje e bukur hendbolli, ndërsa pjesë e saj do të jenë shumë prej lojtarëve reprezentues të Kosovës që janë në të dy skuadrat.