Çfarë do të thotë sulmi i fundit i Hezbollahut në Izrael për rajonin – dhe a sinjalizon një përshkallëzim të madh në luftën kufitare që Izraeli dhe Hezbollahu e kanë zhvilluar mbi kufirin libanez?
Izraeli është i bindur se Hezbollahu i mbështetur nga Irani është përgjegjës për sulmin në një fushë futbolli në komunitetin e Majdal Shams në Lartësitë Golan.
Në skenat e përshkruara si të tmerrshme nga banorët, mjekët u përpoqën të shpëtonin jetën e një grupi të rinjsh që u goditën nga shpërthimi.
Zyrtarët thonë se 12 persona kanë vdekur dhe 20 të tjerë kanë pësuar lëndime.
Bëhet e ditur se viktimat variojnë nga mosha 10 deri në 20 vjeç, shkruan skynews, transmeton Telegrafi.
Zëdhënësi kryesor ushtarak i Izraelit, Daniel Hagari, ka njoftuar se raketat janë lëshuar nga një zonë pranë një fshati të quajtur Chebaa në Libanin jugor.
Analiza mjeko-ligjore ka zbuluar se raketa që ka goditur fushën ishte një raketë Falaq-1 e prodhuar nga Irani, e pajisur me një kokë 50 kilogramësh.
Më herët, Hezbollahu njoftoi në rrjetet sociale se kishte gjuajtur një Falaq-1 në një “seli ushtarake izraelite” si pjesë e një serie sulmesh gjatë gjithë ditës.
Siç raportohet, këto breshëri pasuan një sulm ajror të ushtrisë izraelite që vrau katër persona në Libanin jugor, me Izraelin që deklaroi se ka goditur një ‘qelizë’ ushtarake të Hezbollahut.
Në një deklaratë televizive, Hagari tha se nuk kishte asnjë ndryshim në udhëzimet operative të Komandës së Frontit të Brendshëm të Izraelit.
Kjo sugjeron që ushtria izraelite nuk pret një përshkallëzim të afërt të konfliktit në kufi.
Në atë që ishte një lëvizje e pazakontë për Hezbollahun, një përfaqësues i mediave mohoi publikisht përgjegjësinë, duke thënë: “Rezistenca Islamike nuk ka asnjë lidhje me incidentin dhe kategorikisht mohon të gjitha akuzat e rreme në këtë drejtim”.
Sigurisht, vdekja e 12 të rinjve nuk është diçka me të cilën kjo organizatë e fuqishme politike dhe ushtarake dëshiron të lidhet.
Kryeministri izraelit, Benjamin Netanyahu, “shkurtoi” udhëtimin e tij në Shtetet e Bashkuara dhe pritet të mbledhë një mbledhje të kabinetit të tij të sigurisë.
Siç pritej, ai ka premtuar një përgjigje domethënëse.
Shumica e atyre që jetojnë në Majdal Shams janë arabisht folës që praktikojnë besimin Druze.
Si Izraeli ashtu edhe Hezbollahu janë përpjekur të shmangin luftën e gjithanshme që nga fillimi i luftimeve më 8 tetor – dhe ky realitet duket se nuk ka gjasa të ndryshojë për momentin. /Telegrafi/