Në Qendrën e Paraburgimit në Mitrovicë po vazhdon greva e urisë si shenjë proteste për transferimin e katër të burgosurve serbë që janë dërguar në Burgun e Sigurisë së Lartë në Gërdoc.
Zëvendësministri i Drejtësisë, Nusret Hoxha ka thënë për Tanjug se nuk janë respektuar procedurat për transferimin e katër të burgosurve nga një burg në një burg tjetër dhe në mesin e atyre që janë në grevë urie është udhëheqës i iniciativës qytetare, Oliver Ivanoviq.
“E gjitha ka filluar të shtunën, kur katër të burgosurit u transferuan në burgun e Sigurisë së Lartë në afërsi të Podujevës. Së pari, kjo është bërë pa paralajmërim, nuk ka pasur as edhe një letër të vetme, nuk ka ekzistuar vula dhe nuk ka asnjë kërkesë”, tha Hoxha.
Ai tha se sipas ligjit kërkesë me shkrim për transferim të burgosurve duhet t’i dërgohet drejtorit në këtë rast ushtruesit të detyrës së qendrës së paraburgimit në Mitrovicë, transmeton KP.
“Atë e kanë thirrur vetëm dy minuta para se të shkojnë në derë duke i thënë:’ Ne po vijmë për këta katër të burgosur’”, tha Hoxha.
Zëvendësministri tha se greva e urisë e të burgosurve po vazhdon, ndërsa të transferuarit në burgun e Gërdocit që gjithashtu janë në grevë urie do t’i vizitojë sot ose nesër.
Kundër këtij transferimi ka dalë edhe avokati Nebojsha Vllajiq. Ai tha për Tanjug se burgu i Sigurisë së lartë është burg dhe jo qendër paraburgimi.
Sipas tij, të transferuarit nga burgu i Mitrovicës nuk janë të dënuar por gjenden në paraburgim.