Boston Celtics ka vazhduar me ndeshje të mira dhe fitore në elitën e basketbollit amerikan NBA.
Lideri aktual i Konferencës së Lindjes ka mposhtur para adhuruesve të vet Miami Heat me 13 pikë diferencë 134:121.
Ka qenë një fitore e madhe e Celtics nën regjinë e Jayson Tatum që ishte i jashtëzakonshëm në këtë sfidë.
Ylli amerikan e mbylli ndeshjen me 49 pikë, 11 kërcime e tre asistime, derisa kontribut të madh dha edhe Jaylen Brown me 26 pikë, shtatë kërcime e pesë asistime.
Fitore të madhe ka shënuar edhe Brooklyn Nets përballë Washington Wizards me gjashtë pikë diferencë 113:106.
Kevin Durant ka vazhduar me paraqitje fantastike, ku e mbylli ndeshjen me 39 pikë, pesë kërcime e pesë asistime.
Te fitorja është rikthyer edhe Los Angeles Lakers, ku në Crypto Arena kanë mposhtur Portland Trail Blazers.
Pas 48 minutave lojë rezultati ishte 128:109 në të mirë të LA Lakers.
LeBron James me 31 pikë, shtatë kërcime e tetë asistime si dhe Anthiny Davis me ‘double-double’ prej 27 pikëve e 12 kërcimeve ishin më meritorët për fitoren e tetë sezonale të Lakers. /Telegrafi/
