Tre foshnjet të cilët ndërruan jetë javën e kaluar në Klinikën e gjinekologjisë kanë vuajtur nga sëmundje të mushkërive, ndërsa për rastet tjera janë formuar komisione që do të vërtetojnë nëse ka gabime të mjekëve, deklaroi sot ministri i shëndetësisë, Arben Taravari.
Taravari u shpreh se sipas rezultateve të para, foshnja nga Struga ka vdekur për shkak të sëmundjes nga lindja, ndërsa tre fëmijët e posalindur kanë pasur sëmundje të mushkërive, përcjell Telegrafi Maqedoni.
“Është formuar komision në Ministrinë e shëndetësisë dhe jemi në pritje të rezultateve nga obdukcioni për fëmijën e vdekur nga Ohri, ku ekziston edhe raport nga mjeku kujdestar. Nëse ekziston gabim i mjekut në rastin e vajzës dy vjeçare nga Ohri, dikush do të përgjigjet për atë. Sa i përket rastit të Strugës, do të them se unë nuk mund të përgjigjem për të gjithë personat që vdesin, gjegjësisht kjo ndodh te fëmijët me sëmundje nga lindja e tyre. Foshnja ka ndërruar jetë në shtëpi dhe këtu rasti është i qartë”, tha Taravari.
Komision i veçantë është formuar edhe për rastin e tre foshnjeve të vdekura në Klinikën e gjinekologjisë dhe akusherisë në Shkup dhe se rezultatet e obdukcionit do t’i shfaqen publikut.
“Tre fëmijët kanë pasur probleme shëndetësore të mushkërive dhe inkubatorët nuk janë shkak i vdekjeve. Në ato momente ka pasur inkubatorë të lirë dhe të tre fëmijët kanë qenë të vendosur në inkubatorë. Por më së miri është të priten rezultatet e obdukcionit dhe më pas të jetë qartë i shkaku i vdekjes”, përfundoi Taravari./Telegrafi/