Gratë afgane thonë se ishin mbyllur në bodrumin e një banke për t’i parandaluar që të merrnin pjesë në protestat në Kabul.
Sipas mediave të huaja, përcjell Telegrafi, protestuesit e furishëm dolën në rrugët e kryeqytetit të martën pasi udhëheqësi i rezistencës anti-talebane bëri thirrje për një “kryengritje kombëtare” kundër grupit militant një ditë më parë.
Fotografitë treguan demonstruese femra që grindeshin me luftëtarët talebanë ndërsa një grua shikonte poshtë një pushkë M-16 të drejtuar në fytyrë.
Ndërkohë, pamjet e marra nga një celular tregojnë një grua në një parking nëntokësor makinash, duke u rrotulluar për të zbuluar një turmë grash dhe disa fëmijë të mbledhur në të njëjtën hapësirë.
Dhe videoja ndërpritet me nxitim pasi zëri i një burri dëgjohet duke bërtitur.
Miraqa Popal, kreu i lajmeve në Tolo News të Afganistanit, ndau klipin në Twitter, duke shkruar se disa dëshmitarë okularë thanë se gratë u mbajtën në Bankën Azizi të Kabulit ‘për t’i parandaluar ata që të bashkoheshin me protestuesit’.
Ndryshe, të martën pati një numër protestuesish anti-talebanë në Kabul që kërkonin të drejta për gratë, punën dhe lirinë e lëvizjes.
Demonstruesit gjithashtu brohoritën parulla kundër Pakistanit, duke denoncuar ‘ndërhyrjen’ e vendit në punët e brendshme afgane.
Pakistani është akuzuar për ofrimin e mbështetjes ajrore për talebanët.
Siç ishte raportuar, luftëtarët talebanë qëlluan me armë në ajër për të shpërndarë protestuesit dhe raportohet se bënë disa arrestime. /Telegrafi/