Zëvendëskryeministri i parë i Kosovës, Besnik Tahiri ka vazhduar edhe sot takimet e nivelit të lartë në Bruksel.
Përmes një njoftimi në Facebook, Tahiri ka bërë të ditur se atje është takuar me raportuesen për Kosovën në PE, Viola von Cramon-Taubadel, Ambasadorin Norvegjez në Belgjikë, Per Strand Sjaastad, Drejtorin e ri të Bankës Botërore për Kosovë, Massimiliano Paolucci si dhe shefin e Njësisë për Kosovën në Komisionin Evropian, David Cullen.
Tahiri ka thënë se në këto takime ka falënderuar BE-në për ndihmën e dhënë teksa ka theksuar tri çështje kryesore.
Nevojën e përmbylljes sa më të shpejtë të procesit të liberalizimit të vizave;
Arritjen e marrëveshjes gjithëpërfshirëse në mes të Kosovës dhe Serbisë, e cila duhet të rezultojë me njohje reciproke dhe
Ndihma konkrete në menaxhimin e situatës së krijuar me COVID-19, për Pakon e rimëkëmbjes ekonomike dhe reformat në administratën shtetërore, njofton Telegrafi.
