Kryetari i Vushtrrisë, Xhafer Tahiri deklaroi sot se projektbuxheti për vitin 2021 është i padrejtë për komunën që ai drejton, duke kërkuar kështu që buxheti i shtetit të ndahet barabartë për të gjitha qytetet e Kosovës.
Tahiri në një postim në Facebook ka shkruar se i ka propozuar sot Komisionit për Buxhet dhe Financa pesë amendamente që kanë të bëjnë me projektet në këtë komunë.
“Këto janë projekte jetike për qytetarët e Vushtrrisë, i ftoj deputetët ti përkrahin projektet zhvillimore të qytetarëve të Vushtrrisë, pa dallim partie”, ka shkruar Tahiri, duke shtuar se buxheti i shtetit duhet të ndahet në mënyrë të drejtë e të barabartë për të gjithë qytetarët e qytetet e Kosovës.
Postimi i plotë:
Projekt buxheti i vitit 2021 është i padrejtë për Vushtrrinë
Për tu ndrequr sado pak kjo padrejtësi ndaj qytetit të Vushtrrisë, unë i kam propozuar sot Komisionit për Buxhet dhe Financa 5 amandamente (të gjitha këto kërkesa me kohë i kemi dërguar por janë injoruar nga ministritë e linjës) me projektet si në vijim:
- Zgjerimi i rrugës magjistrale Nedakovc-Vushtrri
- Rritja në 1 milion e mjeteve buxhetore për projektin e rregullimit te shtratit të lumit Silnica (sipas Memorandumit të nënshkruar në mes të Komunës dhe MEA)
- Përfshirja në Ligjin e Buxhetit të projektit të Unazës së poshtme të Vushtrrisë
- Rregullimi i parkut rekreacional “Taraxha”
- Ndërtimi i rrugëve në fshatrat e Vushtrrisë: Skoqen, Samadrexhë-Dumnicë, Sllakoc-Kurillovë dhe rrugëve lokale në qytet.
Këto janë projekte jetike për qytetarët e Vushtrrisë, i ftoj deputetët ti përkrahin projektet zhvillimore të qytetarëve të Vushtrrisë, pa dallim partie.
Buxheti i shtetit duhet të jetë i ndarë në mënyrë të drejtë e të barabartë për të gjithë qytetarët e qytetet e Kosovës. /Telegrafi/
