Ministri i Drejtësisë, Abelard Tahiri, i është drejtuar me letër Ministres së Drejtësisë të Maqedonisë së Veriut, Renata Deskoska, nga e cila ka kërkuar lirimin e Tomorr Morinës.
Përmes kësaj deklarate për media, ministrit Tahiri bënë të ditur se ka kërkuar shqyrtimin e aspekteve ligjore dhe rrethanave të tjera për lirimin e Morinës, i cili u arrestua në territorin e Maqedonisë së Veriut më 24 korrik sipas urdhër-arrestit ndërkombëtar të lëshuar nga autoritetet e Serbisë.
Deklarata e plotë e ministrit Tahiri:
Sot i kam drejtuar një letër homologes sime në Republikën e Maqedonisë së Veriut, Renata Deskoskes, përmes së cilës kam kërkuar lirimin e qytetarit Tomor Morina, i cili është duke u mbajtur në arrest mbi bazën e një urdhër-arresti ndërkombëtar të lëshuar nga Serbia.
Është bërë praktikë politike e pakuptimtë dhe tërësisht irracionale, përndjekja që Serbia vazhdon t’iu bëjë qytetarëve tonë përmes flet arresteve ndërkombëtare, baza e të cilave derivon kryesisht nga regjimi famëkeq i Millosheviqit.
Për më tepër, iracionaliteti i këtyre kërkesave duke u bazuar në juridiksionin inekzistent të saj mbi Kosovën sikur të ekzistonin dy botë paralele, përderisa Republika e Kosovës është shtet sovran dhe askush s’ka të juridiksion mbi të e shtetasit e saj, po e shpërfaqë jo vetëm këtë praktikë, por edhe logjikën e pushtetit të Beogradit si logjikë e përndjekjes së shtetasve tanë për qëllime politike dhe aspak për çështje që kanë të bëjnë me sundimin e ligjit.
Rruga e një shteti që aspiron BE-në e që praktikon një doktrinë përndjekë ndaj qytetarëve të lirë të një vendi fqinje është rrugë që shpie në qorrsokak. Kjo praktikë duhet të marrë fund një herë e përgjithmonë dhe është tepër e nevojshme që në këtë drejtim, Bashkimi Evropian ta ushtrojë presionin mbi Serbinë. Republika e Kosovës nuk do të rrijë indiferent ndaj kësaj çështje, as sot as në të ardhmen, deri kur një praktikë e tillë të marrë fund./Telegrafi/