Drejtori ekzekutiv i Institutit Kosovar për Qeverisje Lokale, Besnik Tahiri, ka thënë se integrimi i veriut nuk bëhet vetëm me dialog politik.
Tahiri ka thënë se Qeveria e Kosovës dhe bashkësia ndërkombëtare duhet ta kthejnë fokusin në ofrimin e shërbimeve sa më të mira për qytetarët e pjesës veriore të vendit.
Ai ka thënë për “Epokën e re” se Serbia po synon të krijojë struktura të mëdha administrative, duke i inkuadruar ato në institucionet e Kosovës që nëpërmjet tyre të ndërtohet një institucion i fuqishëm i përfaqësimit, siç është rasti i asociacionit, e që në esencë ul rolin e komunave.
Tahiri ka thënë se, pavarësisht pengesave, Kosova ka bërë progres në shuarjen e së ashtuquajturës Mbrojtja Civile.
Megjithatë, sipas tij, sfiduese mbetet çështja e punëtorëve të arsimit dhe atyre të shëndetësisë, që ende është e paqartë.