Paneli i Gjykatës Supreme të Dhomave të Specializuara në Hagë ka hedhur poshtë kërkesën e Salih Mustafës që t’i zbutet dënimi prej 15 vjetëve burgim.
Kështu bëhet e ditur në njoftimin për media.
Referuar njoftimit paneli ishte i përbërë prej gjykatësve Ekaterina Trendafilova (kryegjykatëse), Kristine van den Vajngart dhe Daniel Fransen dhe konstatoi se Mustafa nuk identifikoi pse dënimi me 15 vjet burgim përbën shkelje të së drejtës penale.
“Më 25 shkurt 2025, Paneli i Gjykatës Supreme, i përbërë prej gjykatësve Ekaterina Trendafilova (Kryegjykatëse), Kristinë van den Vajngart, dhe Daniel Fransen, hodhi poshtë kërkesat për mbrojtje të ligjshmërisë që parashtruan Mustafa dhe ZPS-ja. Këto kërkesa u dorëzuan në lidhje me vendimin e Gjykatës së Apelit të datës 10 shtator të vitit të kaluar, në të cilin u shqiptua dënimi i ri për Mustafën.
Ndër pika të tjera, Paneli konstatoi se Mustafa nuk identifikoi pse dënimi me 15 vjet burgim përbën shkelje të së drejtës penale.
Në lidhje me kërkesën e ZPS-së, Paneli konstatoi se thjesht mospajtimet me vendime të caktuara nuk përmbushin standardin rigoroz i cili kërkohet që një kërkesë për mbrojtje të ligjshmërisë të ketë sukses”, thuhet në njoftim.
Më shumë informacione mund të gjeni në vendimin e Panelit. /Telegrafi/