Gjykata Supreme sqaron opinionin publik se pretendimet e publikuara nëpër media, dje të Partisë Demokratike të Kosovës sipas të cilave, Gjykata Supreme është e ndikuar politikisht, janë tërësisht të pavërteta.
Në këto pretendime, apostrofohet edhe gjyqtari i Gjykatës Supreme, Erdogan Haxhibeqiri, dhe familja e tij, duke cenuar kështu privatësinë e gjyqtarit dhe familjes së tij, në përpjekje që të ndikohet në vendimet e Gjykatës Supreme.
“Sqarojmë opinionin publik se gjyqtari Erdogan Haxhibeqiri, nuk ka qenë fare pjesë e kolegjit gjyqësor, kur është vendosur për ankesën e subjektit politik Vetëvendosje, ndaj vendimit të Panelit Zgjedhor për Ankesa dhe Parashtresa (PZAP), për rinumërim të votave në Prizren”, thuhet në një reagim nga Gjykata Supreme.
Në reagim të kësaj Gjykate thuhet se Supremja nuk do të bjerë pre e asnjë kërcënimi as shantazhi direkt apo indirekt, nga cilido subjekt politik, grup apo individ.
“Të gjitha vendimet gjyqësore, merren në kolegje prej tre anëtarësh, në përputhje të plotë me ligjin, me profesionalizëm dhe me përgjegjësi të lartë. Ndaj, bëjmë thirrje publike, që të ndalohen sulmet e tilla verbale dhe të respektohet pavarësia e gjyqtarëve dhe organeve të drejtësisë”, thuhet në reagim.