Përveç se është paralajmëruar si vetura më e lehtë në kategorinë e vet, Vazirani Ekonk është njëherit edhe vetura më e shpejtë që ndonjë është prodhuar në Indi.
Siç ka bërë të ditur kompania start-up që qëndron pas kësaj “vepre arti”, në veturë nuk ka ndonjë shtesë të veçantë përveç atyre sa i përket motorit, transmeton Telegrafi.
Kur është fjala për super-vetura elektrike, India ka çfarë të ofrojë. Chanki Vazirani, ndërmarrësi indian me përvojë pune në kompanitë si Rolls-Royce dhe Jaguar, filloi start-up e tij dhe krijoi një veturë unike.
Bëhet fjalë për Ekonk që në përkthim i bie “fillimi i dritës së perëndisë”, e kjo super-veturë do të duhej të shfaqej shpejt në treg.
Sipas themeluesit të kompanisë, është vetura më e lehtë elektrike që ndonjëherë të jetë prodhuar në Indi.
Vazirani Ekonk mund të lavdërohet për peshën e përgjithshme, prej vetëm 738 kilogramëve dhe motorit elektrik që prodhon 711 kuaj-fuqi.
Shpejtësinë nga 0-100 kilometra në orë e arrin për 2,5 sekonda, e shpejtësia maksimale shkon në mbi 300 kilometra në orë.
Sa i përket çmimit dhe prodhimit serik, nuk ka akoma ndonjë informacion konkret. /Telegrafi/
