Paneli Zgjedhor për Ankesa dhe Parashtresa (PZAP) ka vendosur të anulojë zgjedhjet për kryetar të komunës në Hanin e Elezit.
PZAP e ka pranuar si të bazuar ankesën e kandidatit të pavarur, Rufki Suma.
“Procesi i votimit do të përsëritet vetëm për kryetar komune, për shkak të minimit të integritetit të zgjedhjeve si rezultat i presionit dhe organizimit me qëllim të përfitimit të mbështetjeve të votuesve”, thuhet në vendimin e PZAP-it.
Pas këtij vendimi të PZAP ka reaguar kandidati Rufki Suma.
“Vendimi i Panelit Zgjedhor për Ankesa dhe Parashtresa ka qenë i drejtë pasi që kandidati i PDK-së, Mehmet Ballazhi ditën e zgjedhjeve ka qëndruar në secilën qendër votimi që është në kundërshtim me ligjin”, deklaroi Suma në një pronocim për Telegrafin.
Suma thotë se kandidati i PDK-së nuk e ka mohuar që ka vizituar qendrat e votimeve ditën e zgjedhjeve por thotë se është arsyetuar kinse ka qenë shef i shtabit zgjedhor./Telegrafi/