Disa persona janë parë paraditen e sotme në objektin e “Trepçës” duke hyrë në mënyrë demonstrative .Ushtruesi i detyrës së kryeshefit, Enis Abdurrahmani dhe drejtori i Administratës, Besim Haxhiu janë sulmuar fizikisht nga një grup i njerëzve.
Në videon e siguruar, disa persona shihen duke hyrë në vrap ndërsa dëgjohen momentet kur edhe kërkojnë personat e caktuar brenda objektit.
“Po, jam sulmuar, momentalisht jam në spital”, ka thënë shkurt Abdurrahmani.
Edhe Haxhiu ka thënë se është sulmuar fizikisht nga disa persona. Sipas tij, njerëzit që e sulmuan janë të ish-ushtruesit të detyrës së kryeshefit, Rafet Ibishi.
“Disa persona kanë hyrë në objekt më kanë goditur mua. Këta janë njerëz të Rafet Ibisht. Tani këtu është edhe policia”, ka thënë Haxhiu.
Në anën tjetër, KALLXO.com ka kontaktuar edhe Rafet Ibishin për të konfirmuar incidentin brenda objektit në Trepçë. Por, ai ka mohuar se sulmuesit e dyshuar janë njerëz të tij.
Ibishi ka thënë se ata që kanë hyrë në mënyrë demonstrative në objekt po kundërshtojnë zgjedhjen e Enis Abdurrahmanit në pozitën e ushtruesit të detyrës së kryeshefit në këtë ndërmarrje.
“Po qashtu është, janë ardhur. Arsyeja është se është bë një menaxher pa e bë pranim dorëzimin e detyrës ka bërë marrëveshje. Fjala është për Enis Abdurrahmanin. Këta njerëz mund të jenë të Rafetit, Besimit, të gjithëve, ai (Besim Haxhiu) le të thotë çfarë të dojë. Por, unë i kërkova falje edhe në emrin tim, por edhe në emër të punëtorëve, e rastësishme ka ndodhë”, tha Ibishi.
Po ashtu, është kontaktuar edhe Policinë e Kosovës, por ende nuk ka pranuar përgjigje rreth incidentit në fjalë.
Të premten e kaluar, Bordi i Përkohshëm i “Trepçës” shkarkoi nga detyra e ushtruesit të detyrës së kryeshefit, Rafet Ibishin. Në vend të tij, Bordi emëroi Enis Abdurrahmanin. /Telegrafi/