Disa pamje bardhë e zi të regjistruara thuhet se tregojnë një anije patrullimi të dyshuar iraniane që po i afrohet një anije cisternë, pasi ajo ishte sulmuar në Gjirin e Omanit.
Siç shkruajnë mediat e huaja, përcjell Telegrafi, pamjet e publikuara nga ushtria amerikane thuhet se tregojnë Gardën Revolucionare të Iranit duke hequr një minë të pashpërthye nga ana e një tankeri të naftës pasi u sulmua në Gjirin e Omanit.
Ndryshe, raportohet se Uashingtoni e ka fajësuar Teheranin për sulmet ndaj dy anijeve cisternë – Kokura Courageous dhe Frontal Altair – sulme që tronditën tregjet botërore të naftës mes tensioneve në rritje ndërmjet dy vendeve.
Irani ka mohuar përgjegjësinë, duke thënë të premten se akuzat e Amerikës ishin “alarmuese” dhe se shpëtuan ekuipazhin e anijeve cisternë të sulmuara “në kohën më të shkurtër të mundshme”.
Siç ishte raportuar, ekuipazhi i të dy anijeve u detyrua të braktisë anijen pasi që të dyja u përballën me një situatë të rëndë, në ujërat midis Iranit dhe shteteve arabe të Gjirit.
Kapiteni Bill Urban, një zëdhënës i Komandës Qendrore të ushtrisë amerikane, pretendoi se një varkë e Gardës Revolucionare (IRGC) iu afrua Kokura Courageous në orën 4:10 pasdite, të orës lokale të enjten.
Video, siç thuhet tutje, u regjistrua rreth dhjetë orë pas thirrjes së parë rreth fatkeqësisë. /Telegrafi/
