Në gjysmën e parë të vitit ndaj qytetarëve, sipërmarrjeve dhe institucioneve publike shqiptare pati rreth 1 milionë sulme kibernetike.
“Jemi gjatë gjithë kohës në “alert” për të ndje sfidat e sigurisë kibernetike. Shqipëria për fatin e keq është një vend i vogël që prej vitit të shkuar po përballet me sulme kibernetike të sponsorizuara dhe që po vijojnë edhe sot që ne flasim”, tha Igli Tafa, kreu i Autoritetit Kombëtar për Certifikimin Elektronik dhe Sigurinë Kibernetike (AKCESK) për A2 CNN.
Për deputetin socialist Etjen Xhafaj ajo që e bën edhe më të vështirë mbrojtjen e Shqipërisë nga sulmet kiberentike, është ndryshimi i qasjes së këtyre të fundit.
“Tanimë ne nuk kemi vetëm një diskutim për sa i përket sigurisë kibernetike me njerëz të cilët ndërhyjnë te ky lum i madh informacioni. Kemi edhe krahë që krijohen qëllimisht për të mbledhur këtë informacion, për të ndërhyrë e transformuar atë informacion në përpjekje jo më për përfitim personal, por edhe për çështje politike”, tha Xhafaj.
Nga konferenca dedikuar sigurisë kibernetike, eksperti Arjan Dyrmishi nuk i kurseu kritikat edhe për institucionet që kanë për detyrë mbrojtjen nga sulmet në rrugë digjitale.
“Edhe vetë institucione si Ministria e Brendshme, madje edhe ajo e mbrojtjes deri diku nuk kanë dikastere të dedikuara në këtë drejtim:, tha Arjan Dyrmishi, ekspert i sigurisë.
Sulmet nga Irani vitin e shkuar kthyen si kurrë më parë vëmendjen drejt sigurisë kibernetike. Duke reflektuar mbi atë që ndodhi, Qeveria hartoi në prill Strategjinë e re të Sigurisë kibernetike duke synuar të bëjë plotësimet e nevojshme në hallkat që mungonin në zinxhirin strukturor. /Telegrafi/