Për vetëm një kohë të shkurtër është rikthyer në një nga personazhet më të përfolur në trojet shqiptare e po ashtu edhe në tregun ndërkombëtar.
Fjala këtu është për DJ Regard, emri i vërtetë i të cilit është Dardan Aliu, i njohur më shumë për hitet “Secrets” e “Say My Name”, të cilat i lansoi përgjatë vitit të kaluar.
Për të kompletuar vitin e pazakontë për shkak të pandemisë e situatës së krijuar me COVID-19, DJ me prejardhje nga Ferizaj ka dhënë një intervistë për Telegrafin ku flet më në detaje për izolimin në Australi e kthimin në Kosovë, projektet e gjithashtu edhe për sukseset që ka korrë gjatë 2020.
Si ka qenë viti 2020 për DJ Regard?
2020-ta ishte një vit sikur për të gjithë njerëzimin, me sprova të ndryshme. Por, as në këtë vit nuk kanë munguar sukseset në karrierë.
Në momentin kur është përhapur pandemia, ju për një kohë keni qëndruar në Australi, na tregoni pak më shumë rreth kësaj përvoje?
Në fillim të pandemisë unë kam qenë në Australi. Pandemia vetëm sa kishte shpërthyer në Azi dhe Evropë ndërsa në Australi jeta vazhdonte normalisht. Unë po ashtu gjatë asaj kohe isha duke performuar, dilja dhe bëja gjëra të ndryshme derisa u kthyem në Kosovë dhe e kuptuam se çfarë po ndodh këtu.
Çfarë ka realizuar DJ Regard gjatë këtij viti, projektet e juaja muzikore?
Ky vit ka qenë mjaft produktiv. Kam realizuar hitin “Secrets” dhe “Say My Name” të cilat kanë pasur suksese të mëdha e janë transmetuar e dëgjuar nëpër vende të ndryshme në botë.
Sa ka ndikuar ky vit në përfitime, si pasojë e ndalimit të aktiviteteve?
Sikurse për të gjitha dhe në të gjitha fushat, si pasojë e pandemisë ky vit sigurisht që ka ndikuar në çdo aspekt të të gjitha kategoritë.
Sa e keni ndjerë mungesën e koncerteve dhe mbrëmjeve përgjatë këtij viti?
Mungesa e koncerteve dhe mbrëmjeve ka qenë e jashtëzakonshme sepse unë kam dëshirë të jem sa më afër fansave të mi për tu ofruar muzikën time. Po ashtu marrë parasysh që kam qenë shumë aktiv me koncerte, e kam ndjerë në masë të madhe.
Që një kohë jeni duke qëndruar në Kosovë pranë familjes tuaj, a ka qenë kjo një anë tjetër pozitive e pandemisë?
Kohët e fundit apo viteve të fundit kam qenë nonstop nëpër turne në shtete të ndryshme dhe sigurisht që pandemia ka ndikuar që të jem më afër familjes dhe të kaloj më shumë kohë me ta, që është parë një gjë tejet pozitive.
Si e përshkruan 2020 në krahasim me vitet paraprake?
Ky vit nuk ka ndonjë dallim në suksesin tim përveç ndaljes së performancave dhe pamundësisë që të jem afër me fansat e mi.
Cilat janë planet e DJ Regard për vitin 2021?
Gjatë kësaj periudhe të pandemisë kam punuar shumë në disa projekte të cilat do t’i lansoj në vitin 2021 dhe shpresoj se do bëjnë bujë të madhe.
Cili është mesazhi i juaj për të gjithë lexuesit e Telegrafit?
Së pari, faleminderit Telegrafit për intervistën. I përshëndes të gjithë lexuesit tuaj sepse ashtu si ju edhe ata janë më të mirët. /Telegrafi/